نوادر حسني مبارك

نوادر حسنى مبارك



الرئيس حسني مبارك بالطيارة قرر يرمي 100 جنيه
يفرح بها عائلة مصرية
قالت زوجته : خليهم خمسينتين وفرّح عايلتين
قال ابنه : خليهم 25 وفرّح أربع عوايل
قال كابتن الطيارة : يا عم أرم نفسك وفرّ80 مليون مصري

*****

علاء مبارك شارك في برنامج
من سيربح المليون
وصل لآخر سؤال ، السؤال : من هو أكبر حرامي في مصر ؟
طلب مساعدة صديق واتصل بأخوه جمال وقاله السؤال
رد عليه أخوه : انسحب باللي معاك وما تخسرش أبوك !!

*****

مره حسني مبارك راح مدرسة ابتدائي فلما جت فترة الاسئلة ، ولد رفع ايده
مبارك سأله اسمك ايه فقاله رامي فقاله ايه سؤالك يا رامي ؟
رامي : انا عندي اربع أسئلة

1. ليه انت رئيس بقالك 25 سنة ؟

2. لسه معينتش نائب ؟

3. ليه ولادك ماسكين كل حاجة في البلد ؟

4. ليه مصر حالتها الاقتصاديه زفت وانت مبتعملش حاجة ؟


ساعتها بالضبط رن جرس الراحة
وبعد الراحة رجع مبارك وقال احنا كنا فين بقى ؟
مين عنده سؤال ؟
ولد صغير تاني رفع ايده فمبارك سأله اسمك ايه قاله تامر فقاله سؤالك ايه يا تامر ؟
تامر : انا عندى 6 اسئلة

1. ليه انت رئيس بقالك 25 سنة ؟

2. لسه معينتش نائب ؟

3. ليه ولادك ماسكين كل حاجة فى البلد ؟

4. ليه مصر حالتها الاقتصاديه زفت
و انت مبتعملش حاجة ؟

5. ليه جرس الراحة
رن ربع ساعة بدري ؟

6.. وبعدين فين رامي ؟؟؟؟؟؟ !!!!!


*****


مبارك : عارف يا ابليس ياخويا , انا عاوز اعمل في الشعب المصري حركه تطلع من نافوخهم
إبليس : طب هات ودنك وخد الفكره دي .....وش وش وش
مبارك : لالا يا ابليس الفكرة دي مش نافعة , عاوز حاجة أشد
إبليس : طب خد دي ...... وش وش وش وش
مبارك : لالا , برضه مش نافعة , ايه يا ابليس انت بقيت خرع كده ليه , هات بقه ودنك وانا اقولك انا نويت اعمل فيهم ايه
وش وش وش وش وش
ابليس : لا يا راجل حرام عليك

*****

واحد اتحشر في زحمة المرور فلقى واحد بيخبطله
على شباك السيارة
فتح الشباك و سأله : عايز ايه
قاله : الرئيس حسنى مبارك خطفوه و الفدية 5 مليون دولار
و لو الفدية ماتدفعتش .. الخاطفين هددوا يدلقوا عليه بنزين
ويولعوا فيه
و احنا بنجمع تبرعات .. تحب تشارك ؟
الرجل سأل : وفي المتوسط الناس بتتبرع بكام
الرجل الثاني : من 5 الى 10 لتر بنزين


*****
مرة سيادة الريس مد إيده في جيبه لقي 5 مليون جنيه !!
فزعل قوي وخاف وقال : إيه الفلوس دي الفلوس دي حرام؟
فسأل أحد مساعديه فدله على طريق الشيخ طنطاوي
رئيس الأزهر الفاضل وقال له : اسأل الشيخ وهو يقول لك الحل

ما كدبش خبر وجري على الطنطاوي وحكى له القصة فرد:
5 مليون بس .. إيه النزاهة دي؟
دي بسيطة خالص يا ريس ما تزعلش نفسك ؟
كل اللي هتعمله حتروح تمشي بالأحياء الفقيرة ، كل ما تمشي واحد كيلو تتبرع بألف جنيه عن كل مليون جنيه وخلاص .

الريس راح يمشي ، وهو بيمشي قام لقي عمنا صفوت الشريف بيمشي بنفس المكان فقال له : أنت بتعمل إيه هنا ؟ أنت حتمشي كام؟

صفوت قاله 78 كيلو يا ريس
الريس: يخرب بيتك؟ ده أنت خربت البلد !!
صفوت : أنت جاي علي أنا وتحاسبني؟
روح شوف علاء ابنك ، جايب موتوسيكل وبقاله 3 أيام بيمشي فيه


*****


كان حسني مبارك فى سرير المرض حينما أخذ يلقى بوصاياه الأخيرة لوزيره احمد نظيف :
- وصيتك الحكم من بعدى يا احمد
- فى رقبتى يا ريس .. كله تمام والسلطة هياخدها جمال
- ثم راح فى غيبوبة .. أفاق منها بعد قليل
- وصيتك الشعب من بعدى يا احمد
- ما تخافش يا ريس .. الشعب ياكل الزلط
- ثم راح فى غيبوبة .. أفاق منها بعد قليل
- احمد
- نعم يا ريس ؟
- بس ماتنساش .. توكيل الزلط لعلاء


*****


كان حسني مبارك بيخطب في الشعب
فكل شويه واحد يقوم ويقول :
عاش حسني مبارك موحد الاديان ويقعد
يروح حسني مكمل كلامه وشوية ويقوم الراجل
ويقول عاش حسني مبارك موحد الاديان

اتمسك من امن دوله وطااااااااخ

ويقولوله ايه الي انت بتقوله إيه دا ، ازاي موحد الاديان ؟؟؟
دي مصر فيها مسيحين ويهود ومسلمين وطااااااخ
فرد عليهم : يا باشا .... ماهوه موحد الأديان
علشان هوه اللي مكفرنا كلنا


*****


بيقولك واحد تاني لقي الفانوس السحري ودعكه طلعله العفريت
و قالــــــه : شبيك لبيك تطلب أيه ؟
قاله الراجل : أنا عايز كوبري بين القاهرة و أسوان
العفريت قاله : دي صعبة قوي .. نقى حاجة تانية
الراجل قاله : خلاص خلي حسني مبارك يسيب الحكم
العفريت قاله : أنت عايز الكوبري رايح جاي ولا رايح بس


*****